ភ្នំពេញ-បាត់ដំបង ៖ កម្លាំងជំនាញនាយកដ្ឋាននគរបាលព្រហ្មទណ្ឌ បានឃាត់ខ្លួនជនសង្ស័យ២នាក់ ម្នាក់នៅភ្នំពេញ និងម្នាក់ទៀតឃាត់ខ្លួននៅខេត្តបាត់ដំបង ក្នុងករណីប្លន់សម្លាប់នៅរាជធានីភ្នំពេញ កាលពីថ្ងៃទី២៧ ខែមករា ឆ្នាំ២០១៩ នៅសង្កាត់ស្ទឹងមានជ័យ ខណ្ឌមានជ័យ ។
របាយការណ៍របស់នាយកដ្ឋាននគរបាលព្រហ្មទណ្ឌ នៃអគ្គស្នងការដ្ឋាននគរបាលជាតិ ដែលគេហទំព័រអគ្គស្នងការដ្ឋានគរបាលជាតិ ទទួលបាននៅព្រឹកថ្ងៃទី៣ ខែកុម្ភៈ ឆ្នាំ២០១៩នេះ បានបញ្ជាក់ថា ប្រតិបត្តិការនេះធ្វើឡើងក្រោមការបញ្ជាពី ឯកឧត្តម នាយឧត្តមសេនីយ៍ សន្ដិបណ្ឌិត នេត សាវឿន អគ្គស្នងការនគរបាលជាតិ, ឯកឧត្តម ឧត្តមសេនីយ៍ឯក អ៊ិន បូរ៉ា អគ្គស្នងការរង ទទួលផែននាយកដ្ឋានកណ្តាលនគរបាលយុត្តិធម៌ និងឯកឧត្តម ឧត្តមសេនីយ៍ឯក ង៉េង ជួ ប្រធាននាយកដ្ឋាននគរបាលព្រហ្មទណ្ឌ។
របាយការណ៍បានបញ្ជាក់ថា នៅថ្ងៃទី៣១ ខែមករា ឆ្នាំ២០១៩ កម្លាំងជំនាញបានដឹកនាំ និងមានការសហការជាមួយស្នងការដ្ឋាននគរបាលរាជធានីភ្នំពេញ និងស្នងការដ្ឋាននគរបាលខេត្តបាត់ដំបង ដោយកំណត់បាននូវមុខសញ្ញា និងឈានដល់ការឃាត់ខ្លួនជនសង្ស័យឈ្មោះ សាន់ ទង (ហៅ ធី) អាយុ២៥ឆ្នាំ នៅចំណុចច្រកទ្វារអន្តរជាតិដូង នៅផ្ទះសំណាក់លេខ៨២ ភូមិអូជាលើ ឃុំបឹងរាំង ស្រុកកំរៀង ខេត្តបាត់ដំបង ដើម្បីធ្វើការសាកសួរ និងកសាងសំណុំរឿងតាមនីតិវិធី។
ក្រោយពីការឃាត់ខ្លួន និងសាកសួរជនសង្ស័យ បានសារភាពថា ពិតជាបានប្លន់សម្លាប់យកម៉ូតូពីឈ្មោះ យ៉ាន់ វឿន កាលពីថ្ងៃទី២៧ ខែមករា ឆ្នាំ២០១៩ វេលាម៉ោងប្រហែល ១៩និង៣០នាទី នៅសង្កាត់ស្ទឹងមានជ័យទី៣ ខណ្ឌមានជ័យ រាជធានីភ្នំពេញ ពិតប្រាកដមែន។
ដោយឡែក នៅថ្ងៃទី១ ខែកុម្ភៈ ឆ្នាំ២០១៩ កម្លាំងជំនាញបានបន្ដឃាត់ខ្លួនជនសង្ស័យឈ្មោះ សេក សំរ៉ុង អាយុ៣៦ឆ្នាំ នៅចំណុចផ្ទះជួលលេខ១៨៦២ ផ្លូវបេតុង សង្កាត់ចោមចៅទី៣ ខណ្ឌពោធិ៍សែនជ័យ ពាក់ព័ន្ធទិញម៉ូតូ ពីជនសង្ស័យខាងលើ ។
ក្នុងប្រតិបត្តិការនេះ កម្លាំងសមត្ថកិច្ចដកហូត វត្ថុតាងនៅកន្លែងកើតហេតុរួមមាន៖ កូនកាំបិតចិតបន្លែដងតូច ចំនួន១ និងកាតគ្រីម៉ូតូ ចំនួន១សន្លឹក។ បច្ចុប្បន្នកម្លាំងជំនាញនាយកដ្ឋាននគរបាលព្រហ្មទណ្ឌបានកសាងសំណុំរឿង និងបញ្ជូនជនសង្ស័យទាំង២នាក់ ទៅសាលាដំបូងរាជធានីភ្នំពេញចាត់ការតាមនីតិវិធីបន្ត។
សូមជម្រាបថា ករណីនេះកើតឡើង កាលពីថ្ងៃទី២៧ ខែមករា ឆ្នាំ២០១៩ នៅក្នុងបន្ទប់លេខ៣ នៃផ្ទះសំណាក់ឈ្មោះ ចាន់ ត្រជាក់ចិត្ត ដែលស្ថិតនៅទីតាំងផ្ទះលេខ២១៥ ផ្លូវបេតុង ភូមិឫស្សី២ សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ ដែលប្លន់សម្លាប់ យកម៉ូតូពីជនរងគ្រោះឈ្មោះ យ៉ាន់ ធឿន មុខរបររត់ម៉ូតូឌុប ៕
មតិយោបល់