កណ្តាល ៖ ជនរងគ្រោះម្នាក់ផ្លោងជាច្រើនម៉ែតស្លាប់ៗនឹងកន្លែង ក្នុងឧបទ្ទវហេតុគ្រោះថ្នាក់ចរចរណ៍នៅស្រុកគៀនស្វាយខេត្តកណ្តាល ដែលបង្កឡើងដោយរថយន្តកូនរបស់លោកអធិបាលក្រុងតាខ្មៅ។
សមត្ថកិច្ចនគរបាល ស្រុកគៀនស្វាយ បានប្រាប់ឱ្យដឹងថា នៅថ្ងៃទី០៩ ខែឧសភា ឆ្នាំ២០១៧នេះថា កាលពីវេលាម៉ោង ២០ និង ២០នាទីយប់ នាថ្ងៃទី០៦ ខែឧសភា ឆ្នាំ២០១៧កន្លងមកនេះ មានគ្រោះថ្នាក់ចរាចរណ៍មួយបានកើតឡើង រវាងរថយន្តបុកជាមួយម៉ូតូ ក្នុងទិសដៅបើកបរបញ្ជ្រាសទិសគ្នាបណ្តាលឱ្យជនរងគ្រោះអ្នកបើកបរម៉ូតូស្លាប់ភ្លាមៗ លើផ្លូវជាតិលេខ១ ចន្លោះគីឡូម៉ែត្រលេខ(23-24) ក្នុងភូមិដីឥដ្ឋ ឃុំដីឥដ្ឋ ស្រុកកៀនស្វាយ ខេត្តកណ្តាល។
សមត្ថកិច្ចបានបា្រប់ឱ្យដឹងទៀតថា ជនរងគ្រោះស្លាប់បាត់បង់ជីវិតក្នុងហេតុការណ៍នោះ មានឈ្មោះ ផាត់ សុភ័ស្ភ ភេទប្រុស អាយុ ២៨ឆ្នាំ មានទីលំនៅភូមិស្តៅកន្លែង ឃុំដីឥដ្ឋ ស្រុកកៀនស្វាយ ខេត្តកណ្តាល។ ជនរងគ្រោះបើកបរម៉ូតូ ម៉ាកកុបជ្រុង C50 ពណ៏សំបកឪឡឹក ពាក់ស្លាកលេខ កណ្តាល 1H-2197 ត្រូវរថរថយន្តបុកអូសជាង ១០០មែត្រ ទើបអស់ល្បឿនឈប់ ភ្លាមៗនោះ ម្ចាស់រថយន្តបានរត់គេចខ្លួនបាត់ស្រមោល។
នគរបាលបានប្រាប់ថា រថយន្តបង្កគ្រោះថ្នាក់ម៉ាក LEXUS RX330 ពណ៍សរ ពាក់ស្លាកលេខ 2AM-6877 ត្រូវបានគេស្គាល់ជាកូនរបស់លោក ហេង ធៀម អភិបាលក្រុងតាខ្មៅ ខេត្តកណ្តាល បន្ទាប់ពីធ្វើដំណើចេញពីកម្មវិធីមង្គលការមួយនៅម្តុំអ្នកលឿង ហើយបើកបរក្នុងល្បឿនលឿន លុះដល់ចំណុចកើតហេតុ បានបុកម៉ូតូរបស់ជនរងគ្រោះដែលបើកបរក្នុងទិសដៅបញ្ច្រាស់គ្នា បណ្តាលឱ្យស្លាប់នឹងកន្លែងតែម្តង។
កំលាំងប៉ុស្តិ៍ នឹងជំនាញបានចុះដល់ចំណុចកើតហេតុ ធ្វើការពិនិត្យសពនឹងស្រោវជ្រាវរកក្រុមគ្រួសារប្រគល់សព្វជូនយកទៅធ្វើបុណ្យតាមប្រពៃណី។ ចំណែកមធ្យោបាយជំនាញធ្វើការវាស់វែងបន្តនីតិវិធី។
ក្រោយពីកើតហេតុភាគីម្ចាស់រថយន្តដែលគេស្គាល់ថា ជាកូនរបស់លោក ហេង ធៀម អភិបាលក្រុងតាខ្មៅ បានចូលខ្លួនមកសម្របសម្រួលដោះស្រាយជាមួយជនរងគ្រោះមានតំណាង ឈ្មោះលោក ធៀម ប៉ូឡូ សុំធ្វើការដោះស្រាយក្រៅប្រពន្ធ័តុលាការដោយសងសំណងចំនួន ២២០០$ ក្នុងការបញ្ចប់រឿងរដ្ឋប្បវេណី។
ពាក់ព័ន្ធករណីកូនលោកអភិបាលក្រុងតាខ្មៅ បើករថយន្តបង្កគ្រោះថ្នាក់ចរាចរណ៍ បណ្តាលឱ្យអ្នកជនរងគ្រោះម្នាក់ស្លាប់នោះ លោក ព្រុំ សំណាង អធិការរងទទួលបន្ទុកផែនចរាច បានប្រាប់ថា ទោះបីភាគីទាំងសងខាងត្រូវគ្នា ដោះស្រាយសំណងដោយមានការសម្រួសសម្រួលក្រៅពីប្រព័ន្ធច្បាប់ និងមានការឯកភាពពីគ្រុមគ្រួសារសពក៏វាមិនទាន់ចប់ទេ។
ចំណែកលោកឧត្តមសេនីយ៍ត្រី វ៉ែន សុវិន ស្នងការរងទទួលផែនសណ្តាប់ធ្នាប់ចរាចរណ៍ បានអ្នកកាសែត នៅថ្ងៃទី០៩ ខែឧសភា ឆ្នាំ២០១៧នេះថា បើទោះបីមានការសងសំណងតាមច្បាប់រដ្ឋប្បវេណីនៅក្រៅប្រពន្ធ័តុលាការ ក៍ដោយ តែច្បាប់នៅតែច្បាប់មិនអាចរួចទោសទណ្ឌឡើយ។ ករណីខាងលើលោកកំពុងធ្វើរបាយការណ៍នឹងសាក្សីដើម្បីកសាងសុំណុំរឿងបញ្ជូនទៅតុលាការ បើព្រះអាជ្ញាពិនិត្យអង្គហេតុតាមបណ្តឹងអាជ្ញាយ៉ាងណានោះវាផុតដែនសមត្ថកិច្ច ហើយ។ លោក ផ្នែកជំនាញចរាចរណ៍ក៍កំពង់ធ្វើឯកសារសុំណុំរឿងដើម្បីបញ្ជូនតាមទៅតាមនិតិវិធីច្បាប់៕
មតិយោបល់