រថយន្ត​ដឹក​កុងតឺន័រ ព្រលះ​ជាមួយ​រថយន្តក្រុង របួសធ្ងន់​ស្រាល​២០​នាក់​

បាត់ដំបង ៖ យ៉ាងហោចណាស់ក៏មានអ្នកដំណើរចំនួន២០នាក់ដែរ  ក្នុងចំណោមអ្នកដំណើរ ជាច្រើននាក់ដែលជិះនៅក្នុងរថយន្តក្រុង របស់ក្រុមហ៊ុន លី ហុង  ខណៈដែលពួកគេទាំងអស់គ្នាបានធ្វើដំណើរទាំងយប់ចេញពីបាត់ដំបង ឆ្ពោះទៅកាន់ក្រុងភ្នំពេញ ហើយត្រូវបានរថយន្តដឹកកុងតឺន័ររេចង្កូតមកបុកទាំងកម្រោលតែម្តង ។

យោងតាមរបាយការណ៍របស់សមត្ថកិច្ចបានអោយដឹងថា  ករណីគ្រោះថ្នាក់ចរាចរណ៍នេះបានកើតឡើងនៅវេលាម៉ោង២និង៤០នាទី រំលងអធ្រាត្រ  ឈានចូលថ្ងៃទី១០ ខែមិថុនា  ឆ្នាំ២០១៧  នៅលើកំណាត់ផ្លូវជាតិលេខ៥  ក្នុងភូមិ អូសទូក  ឃុំកំពង់ព្រៀងស្រុកសង្កែ  ខេត្តបាត់ដំបង  រវាងរថយន្តដឹកកុងតឺន័រ  ពាក់ស្លាកលេខ
ព្រះសីហនុ  4A-1599  ជាមួយនឹងរថយន្ត របស់ក្រុមហ៊ុន លី ហុង  ពាក់ស្លាកលេខ ភ្នំពេញ 3D-3285 ។

សមត្ថកិច្ចនគរបាលចរាចរណ៍បានឲ្យដឹងថា  នៅមុនពេលកើតហេតុ គឺរថយន្តដឹកកុងតឺន័របានបើកបរក្នុងទិសដៅ ពីភ្នំពេញទៅបាត់ដំបង  លុះទៅដល់ត្រង់ចំណុចកើតហេតុក៏ស្រាប់តែអ្នកបើកបរហាក់បីដូចជាងងុយដេក ធ្វើឲ្យរថយន្តរេចង្កូតទៅឆ្វេងបុករថយន្តក្រុងរបស់ក្រុមហ៊ុន លី ហុង  បណ្តាលអោយរងរបួសអ្នកដំណើរស្រី ប្រុស សរុបចំនួន២០នាក់។

ភ្លាមៗនោះដែរ  មុនពេលសមត្ថកិច្ចចុះទៅដល់  គឺអ្នកបើកបររថយន្តកុងតឺន័រ បានរត់
គេចខ្លួនបាត់ស្រមោល ដោយអ្នកបើកបររថយន្តក្រុងឈ្មោះ គឹម ថុង  ភេទប្រុស អាយុ១៨ឆ្នាំ រស់នៅភូមិ ព្រែកក្តី ឃុំព្រែកតាតេន  ក្នុងខេត្ត កណ្តាល  ក៏រងរបួសធ្ងន់បាក់ជើងខាងឆ្វេង ។

ក្រោយពីបានបញ្ជូនជនរងគ្រោះទាំងអស់ទៅកាន់មន្ទីរពេទ្យរួចមក  កំលាំងសមត្ថកិច្ចបាននាំយករថយន្តទាំងពីគ្រឿងយកទៅរក្សាទុកនៅអធិការដ្ឋានជាបណ្តោះអាសន្នរង់ចាំធ្វើការដោះស្រាយជាក្រោយ ៕